Tramp Zelenskini nədə günahlandırdı?

“Xüsusi hərbi əməliyyatların tapşırıqları yerinə yetirilməyə davam edir. Birləşmiş Qüvvələr Qrupunun bölmələrinin hücumu, demək olar ki, bütün istiqamətlərdə aparılır. Yanvarın ilk iki həftəsi ərzində 8 yaşayış məntəqəsi azad edilib. 300 kvadratkilometrdən çox Ukrayna ərazisi nəzarətimizə keçib”.

Bunu Rusiya Silahlı Qüvvələrinin Baş Qərargah rəisi Valeri Gerasimov bildirib.

Onun sözlərinə görə, Rusiya qüvvələri Ukraynanın şimalında, şərqində və cənubunda cəbhə xətti boyunca, demək olar ki, bütün istiqamətlərdə irəliləməyə davam edir.

“Dnepropetrovsk bölgəsində təhlükəsizlik zonasını genişləndiririk. “Dnepr” qüvvələr qrupunun bölmələri Zaporojye şəhəri istiqamətində hücumlarını davam etdirir”, – deyə V.Gerasimov əlavə edib.

Bu arada, ABŞ Prezidenti Donald Tramp “Reuters”ə müsahibəsində bildirib ki, potensial sülh sazişinin imzalanmasına Rusiya yox, Ukrayna mane olur.

Ağ Ev lideri Rusiya Prezidenti Vladimir Putinin müharibəni başa çatdıra biləcəyini, lakin Ukraynanın sövdələşməyə daha az hazır olduğunu deyib.

Vaşinqtonun rəhbərliyi altında aparılan danışıqların niyə hələ də bu münaqişəni başa çatdıra bilmədiyi barədə suala Tramp qısa cavab verib: “Zelenski”.