Rusiya Ordusu ukraynalı uşaqları xidmətə hazırlayır?

Böyük Britaniya ukraynalı uşaqları deportasiya edən, onlara yanlış ideya aşılayan və hərbi rejimdə saxlayan şəxslərə qarşı sanksiyalar tətbiq edib.

Məhdudiyyətlərə məruz qalanlar arasında Çeçenistanın rəhbəri Ramzan Kadırovun anası da var.

Sanksiya tətbiq olunanlar Rusiyanın siyasətini həyata keçirənlərdir. Siyahıya 8 nəfər və Kreml ilə əlaqəli 3 təşkilat daxil edilib.

R.Kadırovun anası Aymani ilə yanaşı, Rusiyanın yeniyetmə proqramları mərkəzinin rəhbəri Valeri Mayorov da sanksiyalar altındadır. Çünki onlar ukraynalı uşaqlarda Ukraynaya qarşı fikir formalaşdırmağa çalışırlar.

Məlumatda qeyd olunub ki, bu addım Rusiyanın işğal etdiyi Ukrayna ərazilərinin sakinlərinə rus dili və mədəniyyətini sırımaq cəhdləri fonunda atılıb. Rusiyanın məqsədi həmin ərazilərdə Ukraynanın dövlətçilik ideologiyasını unutdurmaqdır.

BMT-nin hesablamalarına görə, işğal olunan ərazilərdəki məktəblərdə hərbi təlimlər keçirilir və ukraynalı uşaqlar Rusiya Ordusunda xidmətə hazırlanır. 19 500 ukraynalı uşaq məcburən Rusiyaya köçürülüb.

Böyük Britaniyanın xarici işlər naziri Devid Lemmi bildirib ki, heç bir uşaq müharibə alətinə çevrilməməlidir:

“Buna görə də biz günahkarları məsuliyyətə cəlb edirik”.