Rusiya qoşunlarına qarşı ağlasığmaz plan | Tarixdə görünməmiş bu üsul işə yaradı?

Soyuq müharibə dövründə Qərbi Avropa Rusiyanın Şimali Almaniyaya doğru irəliləməsi ehtimalından narahat idi. Bunu nəzərə alan Britaniya hökuməti mümkün bir işğalı ləngitmək üçün yollar axtarmağa başlayıb.

1950-ci illərin ortalarında Britaniya "Blue Peacock" adlı bir layihə üzərində işləyirdi. Bu plana əsasən, Şimali Almaniyada yeraltına 8 günə qədər gecikmə ilə aktivləşdirilə bilən 10 kilotonluq nüvə bombaları yerləşdirilməli idi. Məqsəd bölgəni radiasiya ilə çirkləndirərək rus qoşunlarının irəliləməsini və ərazidə məskunlaşmasını əngəlləmək idi.

Lakin layihə çərçivəsində ciddi bir texniki problem ortaya çıxıb. Mütəxəssislər müəyyən edib ki, soyuq hava şəraitində bombanın daxili mexanizmi işləməyə bilər və bu da onun partlayışını qeyri-mümkün edəcək.

Problemi həll etmək üçün qeyri-adi bir üsul düşünülüb. Bombanın içinə canlı toyuqlar yerləşdirilməli idi. Onların bədən istiliyi bombanın içərisində lazımi temperaturu qoruyaraq partlayış mexanizminin donmasının qarşısını alacaqdı.

Britaniya bu planı həyata keçirmək üçün hətta bir prototip də hazırlayıb və sınaqdan keçirib. Lakin ilkin testlərdən sonra layihə heç bir səbəb göstərilmədən dayandırılıb. Bununla da nüvə silahları tarixində ən qeyri-adi ideyalardan biri tarixə qovuşub.