Rusiya robot itlərlə bağlı hərəkətə keçdi | Yeni işçinin vəzifələri

Sankt-Peterburqda yerləşən "Titikaka Rekordlar və Faktlar Muzeyi" robot itlərə qulluq edəcək əməkdaş axtarır.

Vakansiya qeyri-adi və yüksək texnologiyalı iş təklif edir.

Yeni işçinin vəzifələrinə robot itlə muzey ərazisində, o cümlədən ziyarətçilərin olduğu zallarda gəzinti, interaktiv proqramların nümayişində iştirak, cihazın sazlanması və enerji səviyyəsinə nəzarət daxildir.

Həmçinin robotun ətraf mühitlə effektiv qarşılıqlı əlaqəsini təmin etmək üçün komanda ilə birgə işləmək tələb olunur.

Muzeydən bildirilir ki, robotla iş təcrübəsi üstünlük sayılsa da, bu, mütləq deyil. Əsas şərt yeni texnologiyalara maraq göstərmək və ziyarətçilərə robotların iş prinsiplərini izah etməyə hazır olmaqdır.

İş qrafiki çevikdir və qismən məşğulluq təklif olunur ki, bu da tələbələr və əlavə gəlir axtaranlar üçün əlverişlidir. Aylıq əməkhaqqı 100 min rubl, təxminən 2000 manatdır. Təbii ki, bu rəqəm təcrübəyə görə dəyişir. İş isə istəyə görə rəsmiləşdirilə də bilər.

Qeyd edək ki, Rusiyada robot itlərə maraq artır. Məsələn, Moskvada bu tip cihazlar artıq restoranlarda və anbarlarda çatdırılma xidmətlərində istifadə olunur. Titikaka Muzeyi isə bu texnoloji tendensiyanın bir parçası olmaq və robotlarla mədəni-elm sahəsində işləmək fürsəti təqdim edir. Gələcəkdə bu sahənin daha da inkişaf edəcəyi və belə vakansiyaların adi hala çevriləcəyi gözlənilir.