Rusiya-Ukrayna müharibəsində son vəziyyət

Rusiya və Ukrayna arasında sutka ərzində 213 döyüş qeydə alınıb.

Ukrayna Silahlı Qüvvələri Pokrovsk istiqamətində Rusiyanın 57, Limanda isə 44 hücumunun qarşısını alıb.

Rusiya Ordusu 142 pilotsuz uçuş aparatı ilə Ukrayna ərazisinə hücum edib. Ukraynanın hava hücumundan müdafiə sistemləri 92 dronu zərərsizləşdirib.

Odessa da hücuma məruz qalıb. Mülki infrastruktur hədəf alınıb, partlayış və yanğınlar baş verib.

Ukrayna Ordusu isə Rusiyanın Samaradakı neft emalı zavodlarından birini atəşə tutub. Partlayışların baş verdiyi bildirilsə də, dağıntı və insan itkisi barədə məlumat yoxdur.

Rusiya Müdafiə Nazirliyinin məlumatına görə, sutka ərzində Ukraynaya məxsus 118 PUA məhv edilib. Dronların 52-si Belqorod, 26-sı Kursk, 18-i isə Samara səmasında vurulub. Digər PUA-lar Krasnodar, Bryansk, Voronej, Lipetsk, Orenburq, Volqoqrad, Tula, Rostov və Qara dəniz üzərində zərərsizləşdirilib.

Sonda qeyd edək ki, ABŞ-nin sülh planı üzrə danışıqlar davam edir. “The Times”da yayılan məlumata görə, barışıq cəhdləri dalana dirənib, çünki Kreml sülh sazişinin Rusiyaya sərf edəcək şərtlər əsasında imzalanmasını istəyir. Söhbət Ukraynanın qəbul etmədiyi kapitulyasiya, ərazi güzəştləri və Kiyevin NATO-ya üzv olmasından gedir.