Rusiya-Ukrayna müharibəsinin başlamasından iki il ötür

Rusiya ilə Ukrayna arasında hərbi əməliyyatların başlamasından iki il keçir.

Bu, Ukraynanın cənub-şərqində rusiyameyilli qüvvələrlə Ukrayna ordusu arasında 2014-cü ilin aprel ayından bəri başlayan münaqişənin aktiv fazasıdır.

Rusiya Prezidenti Vladimir Putin 2022-ci ilin 22 fevralında Donetsk və Luqanskın müstəqilliyini tanıdığını bəyan etmişdi. Bundan sonra, fevralın 24-ü Rusiya Ukraynaya hərbi müdaxilə etməyə başlayıb. Ölkə rəhbəri bunu “xüsusi hərbi əməliyyat” adı altında rəsmiləşdirib.

Belə ki, Rusiya Belarus ərazisindən də istifadə etməklə Kiyevə hücuma başlayıb, lakin bir müddətdən sonra hərbi uğursuzluqlara düçar olub. Müharibənin başladığı ilk günlərdə bir çox xarici politoloqlar Rusiya qoşunlarının bir neçə gün ərzində Kiyevə qədər gedib çatacağını desələr də, bu baş vermədi. Onlar bir neçə vilayətlərə nəzarəti ələ keçirsələr də, orada möhkəmlənə bilməyib və qoşunlarını bu regionlardan geri çəkiblər. Lakin Rusiya Ukraynanın dörd vilayətini – Donetsk, Luqansk, Xerson və Zaporejye vilayətlərini özünə birləşdirdiyini elan edib.

Bununla belə ilhaq edilən ərazilərin dəqiq bir xəritəsi yoxdur və həmin ərazilərdə müharibə davam edir. Hərbi əməliyyyatların başladığı ilk günlərdən etibarən Avropa İttifaqı və ABŞ Ukraynaya külli miqdarda həm maddi, həm də hərbi yardımlar göndərməyə başlayıb. Hər iki ölkənin silahlı qüvvələrində itkilər durmadan artır. Müharibənin nə zaman bitəcəyi isə heç kimə məlum deyil.