Rusiya Ukraynanın bu əraziləri ilə bağlı hücuma keçdi | Əməliyyatların detalları açıqlandı

“Ukraynanın cənubunda vəziyyət gərgindir. Novopavlovsk istiqamətində Rusiya Ordusunun aktivliyi müşahidə olunur. Silahlı qüvvələr Zaporojye, Donetsk və Dnepropetrovskun inzibati sərhədini yarmağa çalışır”.

Bu barədə Ukraynanın Cənub Müdafiə Qüvvələrinin nümayəndəsi Vladislav Voloşin məlumat verib.

Onun sözlərinə görə, Rusiya kiçik dəstələrlə genişmiqyaslı hücumlar təşkil edir. Hücumlarda zirehli texnikadan da istifadə olunur.

UNIAN-da yayılan digər məlumatda Rusiyanın yay hücum əməliyyatlarına başladığı açıqlanıb.

Bu barədə Xarkov qruplaşmasının spikeri Pavel Şamşin danışıb. O, Rusiyanın İstanbul görüşünə göndərdiyi məmurlar haqqında da tənqidi fikirlər səsləndirib.

“Onları ciddiyə qəbul etmək olmasa da, biz sülhə çalışırıq. Rusiya cəbhədə sükut rejimindən bəhs etsə də, Liptsov və Xarkovşinada hücumlar qeydə alınıb. Ukrayna Ordusu düşmənə məxsus zirehli texnika və motosikletləri məhv edib”, ‒ deyə P.Şamşin bildirib.

Onun sözlərinə görə, Rusiya Ordusu Çerniqova da hücum etməyə çalışır.