Rusiya və Belarus güclərini birləşdirir

Yanvarın 16-da Belarus və Rusiyanın hərbi hava qüvvələri genişmiqyaslı birgə təlimlərə başlayır. Təlimlərin müdafiə xarakterli olduğu və mümkün döyüş missiyalarına hazırlıq məqsədi daşıdığı vurğulanıb.

Belarus Təhlükəsizlik Şurası katibinin müavini Pavel Muraveyko bildirib ki, fevralın 1-dək davam edəcək təlimlər hava müşahidə, hava hücumlarının qarşısının alınması, vacib obyektlərin və kommunikasiyaların hava müdafiəsi kimi məşqləri əhatə edəcək.

Məlumata görə, taktiki uçuş təlimləri zamanı Belarusun Hərbi Hava və Hava Hücumundan Müdafiə Qüvvələrinin bütün aerodromları və təlim meydançalarından istifadə ediləcək. Muraveyko Belarusun cənub sərhədində vəziyyətin sakit olmadığını vurğulayıb.

Qeyd edək ki, Ukrayna Prezidenti Volodimir Zelenski ötən həftə bildirib ki, ölkəsi Belarusdan gələn istənilən zərbəyə hazırlıqlı olmalıdır. Kreml isə Belarus Prezidenti Aleksandr Lukaşenkoya Ukraynadakı münaqişədə daha aktiv rol oynaması üçün təzyiq göstərməsi ilə bağlı iddiaları təkzib edib.