Rusiya və İran liderləri nələri müzakirə etdi?

Rusiya Prezidenti Vladimir Putin iranlı həmkarı Məsud Pezeşkianla telefonla danışıb.

Söhbət zamanı Vladimir Putin Alyaskada ABŞ lideri Donald Trampla keçirilmiş sammitin nəticələri barədə İran Prezidentini məlumatlandırıb.

Bu barədə Kremlin mətbuat xidməti məlumat yayıb.

“Telefon danışığı zamanı Vladimir Putin Enkoricdə baş tutan Rusiya-ABŞ yüksək səviyyəli görüşünün əsas yekunları barədə məlumat verib”, – deyə açıqlamada bildirilir.

Öz növbəsində İran Prezidenti Ukraynadakı münaqişənin sülh yolu ilə həllinə yönələn diplomatik səyləri dəstəkləyib.

Rusiya və İran prezidentləri həmçinin İranın nüvə proqramını və Cənubi Qafqazdakı vəziyyəti də müzakirə ediblər.

“İranın nüvə proqramı ətrafında vəziyyət və Cənubi Qafqaz regionunda baş verən hadisələr də diqqət mərkəzində olub”, – deyə Rusiya tərəfinin məlumatında qeyd olunur.

Kremlin açıqlamasına görə, Rusiya və İran prezidentləri Şanxay Əməkdaşlıq Təşkilatının 31 avqust-1 sentyabr tarixlərində Çində keçiriləcək növbəti sammitində görüşmək barədə razılığa gəliblər.