Rusiya Zaporojyedə irəliləyir, Ukrayna Ordusu isə...

Ukrayna Ordusu əsasən Pokrovsk istiqamətində cəmləşdiyi üçün Rusiya bu ölkənin cənub-şərqindəki yaşayış məntəqələrini ələ keçirir. Orexov və Qulaypole də mühasirə riski altındadır.

“The Telegraph”da yayılan yazıda qeyd olunub ki, Rusiyanın bu hücumları Zaporojyenin də taleyi üçün strateji əhəmiyyətə malikdir.

Məlumata görə, Rusiya Ordusu Pokrovska hücumları artırmaqla Ukrayna Silahlı Qüvvələrini ərazilərin müdafiəsi üçün şimala yönəldib. Bu isə cənubda Rusiya Ordusunun qarşısını açır. Son xəritələrdə Rusiyanın 30 kilometr irəlilədiyi qeyd olunub.

Xarkov vilayətinin Balakleya şəhəri hava hücumuna məruz qalıb. Rusiyanın 2 raket zərbəsi nəticəsində 3 nəfər ölüb, 10 nəfər yaralanıb. Lakin hazırda axtarış-xilasetmə işləri aparıldığı üçün həlak olan və xəsarət alanların sayının artacağı istisna edilmir.

Son sutka ərzində Ukrayna Ordusu Rusiyanın 1160 hərbçisini məhv edib. Ukrayna Silahlı Qüvvələrinin Baş Qərargahından verilən məlumata görə, döyüşlərdə Rusiyanın 2 tank, 3 zirehli maşın, 17 artilleriya, 1 hava hücumundan müdafiə və 1 yaylım atəş sistemləri zərərsizləşdirilib. Həmçinin Rusiyaya aid 213 pilotsuz uçuş aparatı vurulub.

Rusiya Müdafiə Nazirliyinin məlumatına görə, sutka ərzində Ukraynaya aid 36 dron zərərsizləşdirilib. PUA-lar Bryansk, Tambov, Ulyanovsk, Voronej, Orlov, Nijneqorodsk və Tula səmasında vurulub. Həftə ərzində Ukrayna Ordusunun 848 dronu məhv edilib.