Rusiyada çoxarvadlılığa icazə verildi | Qoyulan şərtlər isə görün nələrdir

Rusiya Müsəlmanları Ruhani İdarəsinin Üləmalar Şurası ərlərin arvadları ilə ədalətli və bərabər rəftar etməsi şərti ilə müsəlmanlara dördə qədər dini nikah bağlamağa icazə verib.

Bu barədə yerli mediaya Şura sədrinin və Müsəlman Ruhani İdarəsinin sədr müavini, Moskva müftisi İldar Alyautdinov məlumat verib.

“Kişinin eyni vaxtda ikinci, üçüncü, hətta dördüncü dini nikaha daxil olması ehtimalı ilə bağlı qərar qəbul edilib. Arvad səhhətinə görə uşaq dünyaya gətirə bilmirsə, buna icazə verilir.

Bundan əlavə, reproduktiv yaşın başa çatması ilə əlaqədar bir neçə dini nikahın bağlanmasına icazə var. Arvadın uşaq dünyaya gətirmək istəməməsi də nəzərə alınır”, – İ.Alyautdinov qeyd edib.

O həmçinin bildirib ki, çoxarvadlılığın icazəli olmasının əsas şərti ərin bütün arvadlarına ədalətli və bərabər münasibət bəsləməsidir. Bu, arvadlara bərabər maddi dəstəkdə, onların hər birinə ayrıca mənzil verilməsində özünü göstərir. Şərtlər yerinə yetirilməsə, kişinin çoxarvadlı nikaha girməsinə icazə verilməyəcək.

Bundan əlavə, o, evli kişinin də həyat yoldaşına başqa bir qadınla yenidən evlənmək niyyətini bildirməsinin lazım olduğunu söyləyib. Həmçinin evli kişi başqa dini nikaha daxil olduqdan sonra qadının bütün uşaqlarını övladlığa götürməlidir.