Rusiyada güclü qara görə qəzalar baş verdi, uçuşlar dayandırıldı

Dekabrın 3-də Rusiya paytaxtına düşən qar, yağıntı miqdarına görə gündəlik rekord həddini keçərək 10 mm-ə çatıb.

Moskva hidrometeoroloqları xəbər verir ki, bu, son 145 ilin ən çox qar yağan günü kimi qeyd oluna bilər. Bundan öncəki rekord 1980-ci ilin eyni günündə qeydə alınmışdı – 9,4 mm.

Ən çox qarın Moskvanın mərkəzinə düşdüyü məlum olub. Yağıntının daha bir neçə gün davam edəcəyi bildirilib. Moskvanın Nəqliyyat Departamenti sakinləri şəxsi avtomobillərdən deyil, ictimai nəqliyyatdan istifadəyə üstünlük verməyə çağırıb.

Moskva vilayətində narıncı hava təhlükəsi səviyyəsi elan olunub. Yağan güclü qar çoxlu qəzalara da yol açıb. Belə ki, Moskva vilayətində, Novorijskoye şosesində təxminən 20 avtomobil qəzaya uğrayıb. Hidrometeoroloqların sözlərinə görə, qarşıda moskvalıları Sibir şaxtası gözləyir.

Sinoptiklər xəbər verir ki, ən soyuq gün dekabrın 8-i olacaq. Həmin gün havanın temperaturu mənfi 22 dərəcəyədək enəcək. Qeyri-sabit hava şəraiti ilə əlaqədar olaraq Moskvaya gələn və paytaxtdan uçan 73 reys ləğv edilib və ya gecikir.