Rusiyada miqrantlarla bağlı qadağalar

Rusiyada miqrantlar üçün nəzarətdə qalma rejiminin tətbiqini təklif edən qanun layihəsi hazırlanıb.

Ölkənin Daxili İşlər Nazirliyinin təklifi ilə hazırlanan qanun layihəsinə görə qanunu pozan miqrantlar sürücülük vəsiqəsi ala, avtomobil idarə edə və banklar vasitəsilə pul köçürə bilməyəcəklər. Eyni zamanda, yeni qanun çərçivəsində miqrantlar qaldıqları yer, qaldıqları yerin dəyişdirilməsi, Rusiyadan planlaşdırılan gediş tarixi, yeri və marşrutu barədə məlumat verməlidirlər.

Qanun layihəsi nəzarət edilən şəxslərə qarşı məhdudlaşdırıcı tədbirlər çərçivəsində hüquqi şəxslərin və fərdi sahibkarların dövlət qeydiyyatına alınması, daşınmaz əmlakın, nəqliyyat vasitələrinin dövlət qeydiyyatına alınması, onların avtomobil idarə etmələri məhdudlaşdırılması nəzərdə tutur. Eləcə də, qanunu pozan xarici vətəndaşlara sürücülük imtahanı vermək və sürücülük vəsiqəsini dəyişdirmək, bank hesabı açmaq, pul köçürmək və nikah bağlamağa icazə verilməyəcək.

Qanun layihəsində qeyd olunur ki, əcnəbi vətəndaş barəsində məlumatlar müvafiq reyestrə daxil edildiyi gündən o nəzarət rejimində sayılır. Əgər onlar qaydaları pozarlarsa, deportasiya oluna və ya xüsusi müəssisəyə yerləşdirilə bilərlər.

Daxili İşlər Nazirliyinin Miqrasiya Məsələləri üzrə Baş İdarəsinin rəisi Valentina Kazakova bildirib ki, sözügedən qanun layihəsi müzakirə olunur və tezliklə Dövlət Dumasına təqdim olunacaq. Onun sözlərinə görə, bu cür tədbirlər qeyri-leqal miqrantların müəyyən edilməsinə və onların Rusiya ərazisindən çıxarılmasına gətirib çıxaracaq. Qeyd olunub ki, ölkədə ümumilikdə 6,4 milyon xarici vətəndaş var, onların əksəriyyəti ölkəyə işləmək üçün gəlib.