Rusiyada qalmaqala səbəb olan məsələnin detalları üzə çıxdı | Yeltsinin qızı hədəfə alındı

Rusiyada Yeltsin Mərkəzinin rəhbərinin birinci müavini Lyudmila Telenə qarşı orduya böhtan atmaq ittihamı ilə inzibati iş açılıb.

Səbəb onun 2022-ci ildə “Facebook” sosial şəbəkəsində Rusiyanın mərhum prezidenti Boris Yeltsinin qızı Tatyana Yumaşevanın Ukraynada müharibə əleyhinə postunu “repost” etməsi olub.

Telenin vəkili Mixail Biryukovun sözlərinə görə, yazı 2022-ci il fevralın 25-də dərc edilib və iş bu ilin avqustunda məhkəməyə göndərilib.

Bundan əvvəl Telen “Rossiya 24” və “UralLive” telekanallarını onun İsrail pasportu ilə bağlı şəxsi məlumatlarını göstərən skanını dərc etdiyinə görə açıq şəkildə tənqid etmişdi.

Yekaterinburqun Verx-İsetski Məhkəməsi artıq işə baxmağa başlayıb, amma Telen iclasa gəlməyib. Vəkili vurğulayıb ki, “repost” Moskvada edilib və işə paytaxtın özündə baxılmalıdır.

Qeyd edək ki, bundan əvvəl “tarixi saxtakarlıqları yaymaq” ittihamı ilə Yeltsin Mərkəzinin bağlanması tələb olunmuşdu.