Rusiyada yerli avtomobil məcburiyyəti

Rusiya Prezidenti Vladimir Putin məmurların yerli avtomobillərdən istifadə etməsini nəzərdə tutan əmr imzalayıb.

Kremlin saytı xəbər verir ki, dövlət başçısı fevralın 1-dək bu məsələ ilə bağlı məruzə gözləyir. Bu göstəriş regionların hakimiyyət orqanları ilə birlikdə və Prezident Administrasiyasının iştirakı ilə hökumətə ünvanlanıb.

“Dövlət və bələdiyyə işçiləri tərəfindən rəsmi məqsədlər üçün yüksək dərəcədə lokallaşdırılmış Rusiya nəqliyyat vasitələrinin prioritet istifadəsinə yönəlmiş tədbirlər görülsün. Hesabat 2024-cü il fevralın 1-nə qədərdir”, – təlimat siyahısında deyilir.

Avqustun 3-də istehsal müəssisələrinin rəhbərləri ilə görüşdə Putin deyib ki, idarələr xaricdə istehsal olunan avtomobillərin alınmasının davam etdirilməsi imkanını xahiş ediblər, lakin o cavab verib ki, “bunu tamamilə istisna etmək lazımdır və ölkənin bütün məmurları yerli avtomobillərdən istifafə etməlidir”.

Rusiya Sənaye və Ticarət Nazirliyindən TASS-a bildirilib ki, rus avtomobil istehsalçıları dövlət qurumlarının avtomobillərə olan ehtiyacını ödəyə biləcək imkandadır. “Aurus”, “Avtovaz” və “Moskvich” şirkətləri dövlət sektoru üçün avtomobillərə olan tələbatı ödəmək üçün kifayət qədər istehsal gücünə malik olduqlarını bildiriblər.