Rusiyadan Ukraynaya amansız hücum | Kiyev sakinləri qorxunc hadisədən danışdı

Mayın 24-də gecədən səhərə qədər Ukraynanın paytaxtı Kiyev kütləvi hava hücumlarına məruz qalıb.

Belə ki, paytaxta üç tərəfdən edilən hava hücumu nəticəsində şəhərin beş rayonu ciddi zərər görüb.

Ümumilikdə ötən gecə səhərə qədər Ukraynaya 250-dən çox PUA və 15 ballistik raketlə hücum edilib. Onların yarıdan çoxu isə paytaxt Kiyevə düşüb.

Ukrayna hava hücumundan müdafiə sistemləri bunların qarşısını alsa da, fəsadların, həmçinin ölən və yaralananların olduğu bildirilir.

Kiyev Hərbi Administrasiyasından verilən məlumata görə, təkcə paytaxtda 20-yə yaxın sakin yaralanıb, 2 nəfər həlak olub, 10-dan çox yaşayış binası sıradan çıxıb. Xeyli sayda mülki maşınlara zərər dəyib. Kiyevdən başqa Ukraynanın Sumı, Xarkov, Dnepropetrovsk və Zaporojye vilayətləri də zərbələrə məruz qalıb.

“Valideynlərim o an mənzildə idilər. Onlar içəridə bağlı qaldılar. Giriş qapısı açılmırdı. Zərbədən əyilibmiş. Bütün şüşələr dağılıb tökülmüşdü. Valideynlərim möcüzə ilə sağ çıxdı. Çox qorxulu idi”, − Kiyev sakini Mariya İvanova söyləyib.