Rusiyadan Zaporojyeyə növbəti raket hücumu

Rusiya Ordusu avqustun 5-dən 6-na keçən gecə Ukraynanın Zaporojye vilayətini dron və raketlərlə kütləvi atəşə tutub.

Bu barədə vilayətin Hərbi Administrasiyasının rəhbəri İvan Fyodorov açıqlama verib.

Bildirilib ki, hadisə nəticəsində 2 nəfər ölüb, 12 nəfər isə yaralanıb. O həmçinin yaralılar arasında 4 uşağın olduğunu da söyləyib.

İ.Fyodorovun sözlərinə görə, hücum zamanı 9 tikiliyə ziyan dəyib.

Qeyd edək ki, sutka ərzində bu regiondakı 16 yaşayış məntəqəsinə 567 zərbə endirilib. 15 yaşayış və qeyri-yaşayış binasında dağıntılar qeydə alınıb. Eyni zamanda fərdi yaşayış evləri, anbar və kənd təsərrüfatı texnikası, avtomobillərə də ziyan dəyib.

Ukrayna Silahlı Qüvvələrinin Baş Qərargahından bildirilib ki, son sutka ərzində cəbhədə Rusiya tərəfi ilə 143 döyüş toqquşması qeydə alınıb, onlardan 52-si Pokrovsk istiqamətində gedib.

Əlavə edilib ki, Ukrayna Silahlı Qüvvələri 1010 rusiyalı hərbçini və 300-dən çox hərbi texnikasını məhv edib. Rusiya Müdafiə Nazirliyindən isə bildirilib ki, gecə ərzində hava hücumundan müdafiə qüvvələri Ukraynaya məxsus 51 PUA-nı məhv edib.