Rusiyalı “Dobby”nin dəhşətli həyat hekayəsi | Dünyada 206 insanda olan nadir xəstəlik

Rusiyanın Novosibirsk bölgəsindən olan 14 yaşlı Anna Korçagina dünyada nadir rast gəlinən və vaxtından əvvəl qocalma ilə müşayiət olunan genetik xəstəlik Hatçinson-Qilford sindromundan əziyyət çəkir.

Xəstəliyinə baxmayaraq, yeniyetmə optimist olmağı bacarır. O, cizgi film personajlarından biri olan “Dobby” adını özünə təxəllüs kimi seçib.

Səhhəti ilə bağlı tez-tez xaricə səfər edən “Dobby”nin ən sevimli hobbilərindən biri “YouTube” kanalı üçün videolar çəkməkdir. 900 mindən çox izləyicisi olan yeniyetmə kanalında makiyaj, rəqs və digər əyləncəli məzmunlarda videolar paylaşır.

Annanın atası Maksim Korçaginin sözlərinə görə, qızı ABŞ-nin Boston Uşaq Xəstəxanasında eksperimental müalicə alır. Müalicə vasitəsilə onun ömrünün 25% artırılması üçün pulsuz dərmanlar verilir.

Məlumat üçün bildirək ki, bu xəstəlik 2-3 yaşlarda özünü göstərməyə başlayır. Daha sonra isə bədəndə dəri, skelet və ürək-damar sistemini zədələyərək sürətli qocalmaya gətirib çıxarır. Dünyada cəmi 206 insanda bu nadir xəstəlik var.