Rusiyalı general həbs edildi | Büdcədən milyonları görün necə mənimsəyib

Rusiya Silahlı Qüvvələrinin rabitə planlaması idarəsinin keçmiş rəisi general-mayor Aleksandr Oqloblin həbs edilib. O, rüşvət almaqda ittiham olunur.

İstintaqın versiyasına görə, Oqloblin 2016-2021-ci illərdə “Telta” Perm telefon zavodunun nümayəndələrindən Müdafiə Nazirliyinə rabitə cihazlarının tədarükü üçün dövlət müdafiə sifarişinin icrasına himayədarlığa görə 10 milyon rubl, yəni təxminən 175 min manat rüşvət alıb.

Oqloblinə qarşı xüsusilə külli miqdarda rüşvət alma maddəsi ilə cinayət işi açılıb. Qeyd olunub ki, bu, generala qarşı açılan ilk iş deyil.

Belə ki, 2022-ci il fevralın 14-də Oqloblin 1,6 milyard rubl, yəni 28 milyon manat mənimsədiyinə görə 4,5 il həbs cəzası alıb. Onunla birlikdə Baş Qərargah rəisinin müavini də istintaqa cəlb olunub.

İstintaqın versiyasına görə, onlar avadanlıqları şişirdilmiş qiymətlərlə aldıqlarını sənədlərdə qeyd edərək külli miqdarda dövlət büdcəsindən pul mənimsəyiblər.

Cari ilin avqust ayında azadlığa çıxan Oqloblinə hazırda neçə il hökmün veriləcəyi isə məhkəmədən sonra məlum olacaq.