Rusiyanın dondurulmuş aktivlərinin müddətsiz bloklanması təsdiqlənib

Avropa İttifaqı Şurası Rusiyanın dondurulmuş aktivlərinin müddətsiz bloklanması barədə qərar qəbul edib.

Bununla bağlı Danimarkanın Aİ Şurasına Sədrliyinin bəyanatında bildirilir.

"Avropa İttifaqı Şurası Rusiyanın aktivlərinin müddətsiz bloklanmasını təsdiqləyib", – deyə bəyanatda vurğulanır.

"Reuters" qeyd edib ki, Avropa İttifaqı bununla da Ukraynaya yardım məqsədilə həmin vəsaitlərin istifadəsinə ən ciddi maneəni aradan qaldırıb.

"Avropa İttifaqı Ukraynanın maliyyələşdirilməsini saxlamaq istəyir, çünki Rusiyanın işğalını öz təhlükəsizliyinə təhdid hesab edir. Bunun üçün İttifaq dövlətləri 2022-ci ildə Ukraynaya hücumdan sonra blokladıqları Rusiyanın suveren aktivlərinin bir hissəsini cəlb etməyə çalışır", – deyə məqalədə yazılır.

Avropa İttifaqı ölkələri hökumətləri tərəfindən razılaşdırılmış ilk vacib addım aktivlərin dondurulmasının uzadılması məsələsində hər altı ayda bir səs vermək əvəzinə, Rusiyanın 210 milyard avro dəyərində aktivlərinin lazımi müddətə bloklanmasıdır.

Bu, Moskva ilə digər Avropa İttifaqı dövlətlərinə nisbətən "isti münasibətləri" olan Macarıstan və Slovakiyanın hansısa bir anda dondurma müddətini uzatmaqdan imtina edə bilməsi və İttifaqı Rusiyanın pullarını geri qaytarmağa məcbur etməsi riskini aradan qaldırır.