Rusiyanın ən böyük neft terminallarından biri vuruldu

Rusiyanın Krasnodar diyarı ərazisində “Tamannefteqaz” dəniz neft terminalı PUA hücumuna məruz qalıb.

Bu barədə “RBK-Ukrayna” Ukrayna Baş Kəşfiyyat İdarəsinə istinadən məlumat yayıb.

Qeyd olunub ki, endirilən zərbələr nəticəsində neft terminalının avadanlıq elementləri, mayeləşdirilmiş qaz terminalı və liman infrastrukturu zədələnib, nəticədə, genişmiqyaslı yanğın baş verib.

Ukrayna Baş Qərargahının açıqlamasına görə, partlayışlar nəticəsində boru kəmərləri, iki yanalma körpüsü və iki gəmi məhv edilib. Yanğın min kvadratmetr sahəni əhatə edib.

Maraq üçün bildirək ki, “Tamannefteqaz” şirkətinin operatoru olduğu “Taman” yük kompleksləri Qara dəniz bölgəsində ən iri komplekslərdən biridir. Neft məhsulları və mayeləşdirilmiş qaz üçün ümumi rezervuar parkının həcmi 1 milyon kubmetrdən çoxdur.

Bundan əlavə, Yelenovkada 92-ci çay katerləri briqadasının üzən vasitələrinin müvəqqəti bazası da vurulub. Nəticədə, yanğın başlayıb. Eləcə də Ulan-Udedə motoatıcı alayın sursat anbarı məhv edilib.