Rusiyanın müdaxiləsindən şübhələnirlər

Avropa Komissiyasının Prezidenti Ursula fon der Lyayenin olduğu təyyarə Bolqarıstan üzərində radar siqnallarının pozulması ilə üzləşib. Enişdə çətinliklər yaranıb. Təyyarənin Rusiyanın hücumuna məruz qaldığı iddia olunur.

Avropa Komissiyasının sözçüsü Arianna Podesta bildirib ki, təyyarə Plovdiv hava limanına təhlükəsiz eniş edib və Ursula fon der Lyayen Rusiya və Belarusla sərhəddə yerləşən Avropa İttifaqı ölkələrinə planlaşdırılmış səfərini davam etdirəcək.

“GPS siqnallarının pozulduğunu təsdiqləyə bilərik”, – deyə A.Podesta qeyd edib.

Bolqarıstan hökuməti bu hadisənin Rusiya tərəfindən açıq şəkildə həyata keçirilmiş müdaxilə nəticəsində baş verdiyindən şübhələnir.

Rusiya Prezidenti Vladimir Putinin və Moskvanın Ukraynaya qarşı apardığı müharibənin kəskin tənqidçisi olan Ursula fon der Lyayenin Rusiya və Belarusla sərhəddə yerləşən Avropa İttifaqına üzv ölkələrə 4 günlük səfəri başlayıb.

“Bu hadisə Prezidentin ön cəbhədəki üzv dövlətlərdə həyata keçirdiyi missiyanın nə qədər təcili və vacib olduğunu bir daha göstərir”, – deyə A.Podesta bildirib.