Saakaşvili ilə bağlı son qərar verildi

Tbilisi Şəhər Məhkəməsində Gürcüstanın keçmiş prezidenti Mixeil Saakaşvilinin cəzasının təxirə salınması və ya azad edilməsi ilə bağlı son məhkəmə iclası keçirilib.

3 saatdan çox davam edən iclas zamanı şəhər məhkəməsinin qarşısına Mixeil Saakaşvilinin tərəfdarları toplanıblar. Əraziyə çox sayda hüquq mühafizə orqanlarının əməkdaşları cəlb edilib.

Təxminən 2 ay davam edən məhkəmə dinləmələrinin sonuncu iclasında Saakaşvilinin cəzasının təxirə salınması və ya azad edilməsi ilə bağlı vəsatəti təmin edilməyib. Hakim Giorgi Arevadze Mixeil Saakaşvilinin həbsdə saxlanılmasına qərar verib.

Tərəfdarları Saakaşvilinin azadlığı üçün bütün lazımi tədirləri görəcəklərini, qarşıdakı günlərdə etiraz aksiyalarının keçirilməsinə başlayacaqlarını bildiriblər.

Məhkəmə iclasından sonra əraziyə toplaşanlar üzərində Saakaşviliyə azadlıq kimi ifadələr yazılan plakatlar açaraq, müxtəlif şüarlar səsləndiriblər.