Sağlam yuxu, düzgün qidalanma və stresdən uzaq olmaq lazımdır

Sürətli pəhriz proqramları və həddindən artıq fiziki yüklənmə orqanizmdə yorğunluq yaradır, nəticədə itirilmiş çəki qısa müddətdə geri qayıdır. Bu səbəbdən ekspertlər kəskin məhdudiyyətlər yerinə, yüngül rejimə riayət edərək hədəfə tədricən çatmağı məsləhət görürlər.

Bu barədə LEVITA beynəlxalq balet və dartınma studiyaları şəbəkəsinin baş məşqçisi və müəllim hazırlığı şöbəsinin müdiri Akulina Baxturina danışıb.

Mütəxəssis bildirib ki, cəmi altı həftə ərzində yağ kütləsini azaltmaq və əzələləri bərkitmək mümkündür.

Sağlam çəki itkisi üçün həftəlik norma isə 0,5-1 kiloqram arası müəyyən edilir. Uğurlu nəticə üçün həftədə 3-4 dəfə, hər biri 30-45 dəqiqə olmaqla məşq etmək kifayətdir. Bu prosesdə güc, kardio və dartınma (stretching) hərəkətlərini kombinasiya etmək, həmçinin gün boyu fiziki aktivliyi yüksək tutmaq vacibdir.

Altı həftəlik proqrama gəlincə, 1-2-ci həftə  bədənin yeni rejimə öyrəşmə mərhələsi olmalıdır. 3-4-cü həftə məşqlərin tempinin və intensivliyinin artırılması, 5-6-cı həftə isə əldə olunmuş nəticələrin sabitləşdirilməsi kimi nəzərə alınmalıdır.

Məşqçi qeyd edir ki, baza hərəkətləri olan plank və çömbəlmə (squat) tamamilə yetərlidir. Hər gün fasiləsiz idman etmək isə yanlış yanaşmadır, orqanizmin bərpası üçün həftənin 2-3 gününü istirahətə ayırmaq lazımdır. Əks halda, zədələnmə riski və xroniki yorğunluq yarana bilər.

Sonda vurğulanıb ki, səmərəli nəticə üçün sağlam yuxu, düzgün qidalanma və stresdən uzaq durmaq ən vacib şərtlərdir.