Sakinlər təcili təxliyə olunur | Tayvanda güclü zəlzələ

Tayvanda baş verən 7,5 maqnitudalı zəlzələ nəticəsində azı 4 nəfər ölüb, 97 nəfər yaralanıb.

Bu barədə Tayvanın Yanğınsöndürmə Xidməti məlumat yayıb.

Bir neçə bina əyilib, lakin dağılmayıb. Hadisə yerinə gələn xilasedicilər yanğın nərdivanlarından istifadə edərək sakinləri pəncərələrdən çıxarıblar.

Təbiət hadisəsi yerli vaxtla saat 07:58-də baş verib və bütün Tayvan ərazisində hiss olunub.

Yerli seysmoloqların məlumatına görə, zəlzələnin episentri Hualyan şəhərindən 25 km cənub-şərqdə Sakit okeanda, ocağı isə 15,5 km dərinlikdə yerləşib. Bundan sonra ərazidə 20-dən çox yeraltı təkan qeydə alınıb.

Bildirilir ki, bu, son 25 ildə Tayvanda baş verən ən güclü zəlzələdir. Təbii fəlakət səbəbindən digər ölkələrdə sunami təhlükəsi elan olunub.