Sarkomaya əlac tapıldı? | Tədqiqatda iki virusdan istifafə edildi, görün nələr üzə çıxdı

Rusiya Səhiyyə Nazirliyinin Seçenov Universitetinin tədqiqatçıları sümüklərdə və ya yumşaq toxumalarda əmələ gələn bədxassəli şiş olan Yuinq sarkoması üçün dərmanların məqsədyönlü şəkildə çatdırılmasına yeni yanaşma hazırlayıblar.

Bunun üçün onlar alternatera mozaik virusunun (VMalt) dəyişdirilmiş hissəciklərindən istifadə etməyi təklif ediblər.

Bu virus bitkiləri yoluxdurur, lakin insanlar üçün təhlükəsizdir, çünki o, məməlilərin hüceyrələrində çoxalmağa qadir deyil. Bitki virusları hələ terapiyada istifadə edilmir, lakin onların istifadə perspektivləri bütün dünyada fəal şəkildə öyrənilir.

Seçenov Universitetinin Regenerativ Tibb İnstitutunun müasir biomateriallar şöbəsinin intern-tədqiqatçısı Daria Fayzullina Gazeta.Ru-ya müsahibəsində bildirib ki, tədqiqat üçün alimlər iki növ virusdan istifadə ediblər.

Virusları 98°C-yə qədər qızdırmaqla, kiçik ölçülərinə görə şiş hüceyrələrinə daha yaxşı nüfuz edən sferik hissəciklərə çeviriblər. Komanda bu hissəcikləri Yuinq sarkomasının hüceyrələrində və sağlam fibroblastlarda sınaqdan keçirib. Nəticələr göstərib ki, virus hissəcikləri şiş hüceyrələrinə effektiv şəkildə nüfuz edir.

“Biz ilk dəfə göstərdik ki, virus hissəcikləri əlavə modifikasiya olmadan şiş hüceyrələri üçün yüksək seçicilik nümayiş etdirir. Bu, terapevtik məqsədlər üçün yeni imkanlar açır”, – Fayzullina vurğulayıb.

Hüceyrələrə hissəciklərin daxil olmasının dəqiq mexanizmi hələ də məlum deyil. Alimlər bundan sonrakı araşdırmalarda bunu araşdıracaqlar. Onlar həmçinin strukturu dəyişdirilmiş hissəciklərin osteosarkoma və qlioblastoma kimi digər şiş növlərinə təsirini öyrənməyi planlaşdırırlar.