Şarlatanlar hesaba çəkiləcək | UFC çempionundan qalmaqallı paylaşım

UFC-nin keçmiş çempionu Konor Makqreqor 2025-ci ildə keçiriləcək seçkidə İrlandiyanın prezidenti vəzifəsi uğrunda mübarizə aparmaq niyyətində olduğunu bəyan edib.

Qarışıq döyüş növləri üzrə idmançı bu barədə özünün “X” sosial şəbəkəsindəki səhifəsində yazıb.

“Prezident kimi mən həm parlamentin aşağı palatasını çağırmaq, həm də onu buraxmaq səlahiyyətinə malik olacağam. Artıq demişəm ki, İrlandiya xalqının sadə işçiləri qarət edən, kiçik biznesi və ailə dəyərlərini məhv edən bu adamlardan cavab almaq istədiyi bütün suallara cavab lazımdır. Yüksək vəzifələri tutan şarlatanlar cavab verməyə çağırılacaqlar”, – deyə K.Makqreqor qeyd edib.

UFC-nin keçmiş çempionu həmçinin bildirib ki, İrlandiyaya xalqdan olan aktiv prezident lazımdır və vurğulayıb ki, o, 2025-ci ildə yeganə məntiqi seçimdir.

K.Makqreqor son döyüşünü 2021-ci ilin yayında “UFC 264” turnirində amerikalı Dastin Puaryeyə qarşı keçirib. Döyüş birinci raundda K.Makqreqorun ayağının sınması ilə başa çatıb.

O, 2024-cü ilin iyununda üç ildən sonra ilk dəfə amerikalı döyüşçü Maykl Çandlerə qarşı çıxmalı idi, lakin irlandiyalının zədəsi səbəbindən döyüş ləğv edilib. Avqustun ortalarında UFC-nin rəhbəri Deyna Uayt K.Makqreqorun 2024-cü ildə oktaqonda görünməsini istisna edib.