Səfirdən etiraf: "S-400 məsələsi tezliklə həll olunacaq"

ABŞ-nin Türkiyədəki səfiri Tom Barrak Vaşinqton və Ankara arasındakı ən gərgin mövzulardan biri olan S-400 və F-35 böhranı ilə bağlı dünya gündəminə təsir edən bəyanatlar verib.

Səfir həm Türkiyənin F-35 proqramına qayıtması, həm də Rusiya Hava Hücumundan Müdafiə sistemləri ilə bağlı problemin yaxın zamanlarda həllini tapacağını elan edib:

“İki ölkə arasındakı münasibətlər heç vaxt bu qədər yaxşı olmayıb. Düşünürəm ki, S-400 məsələsinin tezliklə həll olunacağını görəcəksiniz. Donald Trampın baxış bucağına görə, Türkiyənin F-35 proqramına qoşulması normaldır”.

Tom Barrak çıxışında vurğulayıb ki, Türkiyə NATO-nun ikinci ən böyük ordusuna sahib olan nəhəng bir qüvvədir və Avropanın müdafiəsi üçün etdiyi işlər inanılmazdır.

Səfir etiraf edib ki, Türkiyəyə qarşı tətbiq edilən sanksiyalar, o cümlədən F-35 proqramından çıxarılması effektiv olmayıb, çünki sanksiyaya məruz qalan ölkələr daha ağıllı yollar taparaq bu məhdudiyyətləri aşmağı bacarırlar.

Diplomatın sözlərinə görə, Donald Tramp və Rəcəb Tayyib Ərdoğan arasındakı birbaşa dialoq sayəsində F-16 qırıcıları ilə bağlı danışıqlar bərpa edilib və Alyans daxilində münasibətlər yenidən qurulur.

Beləliklə, diplomat S-400 düyününün tezliklə açılacağını bildirərək bu tarixi gərginliyin sona çatacağına dair ən ciddi siqnalı verib.