Səkkiz ildir içki içmir, amma sərxoşdur

ABŞ-nin Florida ştatında yaşayan Mark Mongiardo 2018-ci ildən etibarən spirtli içkilərdən tam imtina etsə də, mütəmadi olaraq sərxoşluq halı yaşayır. 

Bu barədə “New York Post” məlumat yayıb.

Həkimlərin bildirdiyinə görə, buna səbəb nadir rast gəlinən “avtopivə sindromu”dur – bu zaman spirt insan orqanizmində, xüsusilə bağırsaqlarda yaranır.

Mütəxəssislərin məlumatına görə, dünyada bu cür halların sayı 100-dən azdır. Sindromun mahiyyəti bağırsaqlarda maya göbələklərinin həddindən artıq artması ilə bağlıdır. Onlar qida vasitəsilə qəbul edilən karbohidrat və şəkərləri fermentləşdirərək etanola çevirir. Nəticədə, çörək və ya şirniyyat kimi adi qidalar belə qanda alkoqol səviyyəsinin yüksəlməsinə səbəb ola bilər. Mark uzun müddət bu simptomların səbəbini anlaya bilməyib. O, yorğunluq, lənglik və diqqət dağınıqlığını müəllim və məşqçi kimi gərgin iş rejimi ilə əlaqələndirib.

Lakin zaman keçdikcə hallar daha da ağırlaşıb: nitqdə anlaşılmazlıq, koordinasiya pozuntusu və şüur bulanıqlığı müşahidə olunub.  Bu vəziyyət ciddi nəticələrə gətirib çıxarıb. Kişi işini itirib, həmçinin Nyu-York ştatı ərazisində sərxoş vəziyyətdə avtomobil idarəetmə ittihamı ilə iki dəfə məsuliyyətə cəlb olunub. Bu hallardan biri onun artıq spirtli içkilərdən imtina etməsindən sonra baş verib.

Hazırda o, vəziyyətinə nəzarət etmək üçün ciddi pəhriz saxlayır və müxtəlif qidaların orqanizmə təsirini izləyir. Mark avtomobil idarə etməzdən əvvəl mütəmadi olaraq qanda alkoqol səviyyəsini yoxlayır və daim “alkotester”lərdən istifadə edir.