Sel ərazini yuyub apardı, daş daş üstündə qalmadı | Xeyli ölən var

ABŞ-nin Texas ştatında daşqınlar nəticəsində azı 78 nəfər ölüb.

“Reuters”də yayılan görüntülərdə Kinqslend dambasında suyun səviyyəsinin necə yüksəldiyi əks olunub.

Fövqəladə vəziyyətlə əlaqədar ABŞ Prezidenti Donald Tramp da regiona səfər etməyi planlaşdırır:

“Biz qubernator Qreq Ebbotla əlaqə saxlamışıq. Baş verənlər dəhşətlidir. Orada yaşayanların Tanrı köməyi olsun. Texası Tanrı qorusun”.

Qvadelupa çayının məcrasından çıxması ilə bağlı görüntülər də yayılıb. Axtarış-xilasetmə işləri davam etdirilir. İtən insanların axtarışına 600 könüllü cəlb olunub. Ölümcül daşqının ən çox ziyan vurduğu yerlərdən biri yay düşərgəsidir. Orada 10 nəfərdən hələ də xəbər yoxdur.

Texasın digər ərazilərində isə 41 nəfərin axtarışları aparılır. Bu barədə Texasın qubernatoru Qreq Ebbot məlumat verib.

“Qarşıdakı 48 saat təhlükəli hesab olunur. Çünki güclü leysan yağışları qəfil daşqınlara gətirib çıxarır. İnsanlar bunu nəzərə almalı və təhlükəli ərazilərə səfər etməməlidirlər”, – o bildirib.

Qeyd edək ki, gözlənilməz güclü yağışlara görə Texasda iyulun 4-də suyun səviyyəsi 9 metr qalxıb. Daşqınlar da bundan sonra başlayıb.