Seulda çaxnaşma davam edir? | Hərbi texnikalar şəhərin mərkəzində

Cənubi Koreyada fövqəladə vəziyyət elan olunduqdan sonra paytaxt Seulun küçələrinə hərbi texnika yeridilib, helikopterlər isə səmada patrul fəaliyyətinə başlayıb.

Bu barədə ölkə Ordusunun generalı Pak An Su bildirib.

Onun sözlərinə görə, artıq parlamentin binası qarşısına toplaşan müxalifət tərəfdarları ilə polis arasında toqquşmalar qeydə alınıb. Bunların fonunda ölkənin müxalifətdəki Demokratik Partiyasının lideri Li Cje Mön hərbi vəziyyət rejiminin tətbiqini Konstitusiyaya zidd addım adlandıraraq əhalini parlament binasının önündə toplaşmağa çağırıb.

Qeyd edək ki, Cənubi Koreyanın Konstitusiyasına əsasən, qanunverici orqan səs çoxluğu ilə hərbi vəziyyətin ləğvi barədə qərar qəbul etsə, dövlət başçısı onun icrasını təmin etməlidir.

Əlavə olaraq, ölkədə Hərbi Vəziyyətə Nəzarət üzrə Qərargah bu halın qüvvədə olacağı müddət ərzində ölkədə parlamentin və siyasi partiyaların fəaliyyətini müvəqqəti olaraq dayandırıb.

Eyni zamanda ölkənin parlamentinə giriş-çıxış da artıq dayandırılıb. Bildirilib ki, qanunverici orqanın əməkdaşları ilə birlikdə deputatların da binaya girişinə icazə verilmir.

Onu da bildirək ki, hərbi vəziyyətin tətbiqi barədə qərar Prezident Yun Sok Yolun impiçmenti prosesinə başlanacağı barədə informasiya yayıldıqdan sonra verilib.