Sidneydə baş verən terrordan sonra hökumət yeni qərarlar qəbul edir

Avstraliyanın Baş naziri Entoni Albanez Sidney çimərliyində baş verən terror aktından sonra milli silah qanunvericiliyini sərtləşdirməyi təklif edib.

Onun sözlərinə görə, hökumət silahla bağlı qanunların sərtləşdirilməsi də daxil olmaqla lazımi tədbirlər görməyə hazırdır.

“Biz bunu edən qorxaqlardan daha güclüyük. Hökumət zəruri olan istənilən tədbiri görməyə hazırdır. Bunun üçün daha sərt silah qanunlarına ehtiyac var. Milli Kabinetin gündəliyinə daha sərt silah qanunlarını, o cümlədən fərdi istifadə üçün və ya lisenziya ilə verilən silahların sayına məhdudiyyətlərin qoyulmasını daxil edəcəyəm”, – deyə o bildirib.

Yeni Cənubi Uels ştatının Baş naziri Kris Minns öz növbəsində bildirib ki, ştatda silah qanunları dəyişdiriləcək. O, silah lisenziyalarının müddətsiz verilməsinə qarşı olduğunu vurğulayıb. Avstraliyanın silah haqqında qanunu sonuncu dəfə 1996-cı ildə Port-Arturda 35 nəfərin ölümünə səbəb olan kütləvi atışmadan sonra nəzərdən keçirilib.