Simonyanlar arasında gərginlik | Ermənistanlı sədr Paşinyana görə özündən çıxdı

Ermənistan parlamentinin spikeri Alen Simonyan “Rossiya Seqodnya” beynəlxalq media qrupunun və RT telekanalının baş redaktoru, rusiyalı təbliğatçı Marqarita Simonyanı “çirkinlərin sirk şousundan çıxan rəzil məxluq” adlandırıb.

O bu barədə “X” səhifəsində məlumat yayıb.

“Hazırda Rusiya ərazisində fəaliyyət göstərən çirkinlərin sirk şousundan daha bir rəzil məxluq ölkəmizin suveren işlərinə qarışmaqdan əl çəkmir. Erməni köklərinə müraciət edən və “yan” ilə bitən soyadından başqa Ermənistan və erməni xalqı ilə heç bir əlaqəsi olmayan şəxs ara-sıra media məkanında peyda olur, Ermənistan rəhbərliyini təhqir edir, xalqı ölkəmizdə mitinqlərə, hökuməti isə devirməyə çağırır. Ölkəni və xalqı təhdid etməklə yanaşı, yalan yayır. Yəqin ki, artıq təxmin etdiniz.

Olmayan bir sənədlə bağlı naməlum qəzetin mövcud olmayan müəlliflərinə istinad edərək növbəti yalanı yayan M.Simonyandan danışırıq. Ümumiyyətlə, yuxarıda adıçəkilən sirkdə sanki Olimpiada başlayıb. Bu şüarlar altında: “Daha çox yalan”, “Daha iyrənc”, “Daha alçaq”. M.Simonyan isə daha bir qızıl medal uğrunda mübarizə aparır”, – o bildirib.