Sovet casusunun nəvəsi Fransa prezidentliyinə namizəd oldu

Fransanın “İctimai tribuna” partiyasının lideri və Avropa Parlamentinin deputatı Rafael Qlyuksman 2027-ci ildə keçiriləcək Fransa prezident seçkilərində iştirak etmək niyyətində olduğunu açıqlayıb.

O bu barədə yerli televiziya kanalının efirində bildirib.

Məlumata görə, Rafael Qlyuksman SSRİ üçün çalışan kəşfiyyatçı Rubin Qlyuksmanın nəvəsidir.

“Bəli, mən prezident seçkilərində namizədəm”, – deyə Qlyuksman seçki yarışında iştirakını təsdiqləyərək deyib.

Siyasətçi həmçinin qeyd edib ki, partiyasının və Fransa Sosialist Partiyasının payızda keçirməyi planlaşdırdığı ilkin seçkilərdə iştirak etmək niyyətindədir.

Qeyd edək ki, Fransada prezidentliyə namizədin rəsmi qeydiyyatdan keçməsi üçün 500 seçilmiş nümayəndənin dəstəyini qazanması tələb olunur.

Fransada prezident seçkilərinin 18 aprel 2027-ci ildə keçirilməsi planlaşdırılır. Zərurət yaranacağı təqdirdə ikinci tur mayın 2-də keçiriləcək. Hazırkı prezident Emmanuel Makron seçkilərdə iştirak etməyəcək. O, iki ardıcıl müddət ərzində ölkəyə rəhbərlik etdiyi üçün yenidən prezident seçilmək hüququna malik deyil.