“SSRİ” yazılı köynək qalmaqal yaratdı | Putin və Lavrovdan diqqətçəkən açıqlama

Rusiyanın xarici işlər naziri Sergey Lavrov “Ultrahang” “YouTube” kanalına müsahibəsində insanları Alyaskada keçirilən Rusiya‒ABŞ sammitində geyindiyi “SSRİ” yazısı olan köynəkdə gizli məna axtarmamağa çağırıb.

Diplomat sözügedən geyiminini Rusiyanın tarixi ilə əlaqələndirib.

“Sovet İttifaqı mənim vətənimdir. Mən orada doğulmuşam, gəncliyimdən və orada Xarici İşlər Nazirliyində işləməkdən həzz almışam. Vətənimizdən utanmaq lazım deyil”, ‒ nazir bildirib.

O əlavə edib ki, üzərində “SSRİ” sözü yazılmış köynək çox qəşəngdir və Rusiyada məşhurdur.

“Bizdə Rusiya imperiyasının gerbi olan köynəklər var. Onları çox adam geyinir. Bu, tarixin bir hissəsidir”, ‒ XİN rəhbəri bildirib.

Qeyd edək ki, avqustun 15-də Rusiyanın xarici işlər naziri Sergey Lavrov Rusiya‒ABŞ sammiti ərəfəsində Ankoricdəki hotelinə “SSRİ” yazısı olan Çelyabinsk brendi “SelSovet”dən olan sviter geyinərək gəlib. Britaniyanın “Sky News” telekanalı paltarı 20-ci əsrdə ABŞ və SSRİ arasında olmuş “soyuq müharibə”yə mesaj hesab edib. Amerikanın CNN televiziya kanalı isə iddia edib ki, köynək Rusiyanın böyük güc statusuna qayıtmasına siqnaldır.

Daha sonra Rusiya Prezidenti Vladimir Putin Lavrovu sviterinə görə zarafatla “imperialist” adlandırıb. Ukraynanın keçmiş xarici işlər naziri Dmitri Kuleba isə diplomatın Alyaskada üzərində “SSRİ” yazılmış sviter geyinməsini “Rusiyanın kimliyinin nümayişi” adlandırıb.

Alyaska sammiti günü sviter 10 990 rubla satılıb. Onun istehsalçıları böyük tələbat səbəbindən 24 saatlıq fəaliyyətə keçməli olublar.