Suriyada silahlar yalnız bu şəxslərdə olacaq | Detallar açıqlandı

Suriyada keçid dövrü üç ildən beş ilə qədər davam edə bilər, ölkədə səlahiyyətlərin böyük hissəsi prezidentə verilir.

Bu barədə “Əl-Cəzirə” telekanalı Suriya hökumətinin yeni konstitusiya layihəsinə istinadla məlumat yayıb.

Kanalın mənbələrinə görə, yeni konstitusiya layihəsinə əsasən, Suriya prezident respublikası ola bilər. Layihədə ölkə qanunvericiliyinin İslam hüququ prinsiplərinə əsaslanacağı qeyd olunub.

Həmçinin bildirilir ki, milli ordunun əsas vəzifəsi vətənin və Suriya vətəndaşlarının qorunması, ölkədə vətəndaş sülhünün təmin edilməsi olacaq. Silahlar yalnız dövlət strukturlarında olacaq.

“Əl-Cəzirə” qeyd edir ki, yeni konstitusiya layihəsi 1950-ci ilin əsas qanununun prinsiplərinə əsaslanır.

Artıq Suriyanın keçid hökumətinin formalaşdırdığı Konstitusiya Komissiyası konstitusiya layihəsinin hazırlanmasını başa çatdırıb.

Məlumata görə, sözügedən sənəd Suriya Prezidenti Əhməd əl-Şaraaya təqdim ediləcək.

Xatırladaq ki, Əhməd əl-Şaraa martın 2-də yeddi ekspertdən ibarət Konstitusiya Komitəsini təsdiqləyib.