Suriyanın hansı bölgələri ələ keçirildi? | Döyüşçülər əsir götürüldü

Suriyanın Hələb bölgəsində Bəşər Əsəd rejimi və ona qarşı çıxan “Heyət Təhrir əş-Şam” qruplaşması arasında toqquşmalar baş verib.

Qarşıdurmalar zamanı qruplaşma 32 bölgəni ələ keçirib.

Döyüşlər zamanı qruplaşmaya bağlı silahlı dəstələr Əsəd rejiminin nəzarətində olan Hələbin qərb hissəsindəki Akil təpəsi, Ər-Ragib təpəsi, Kuptan dağı, Debbabat təpəsi, Ancara qəsəbəsi, Basartun, Hur, Elkasimiyye, Acil, Bele, Sellum, Kefer Bissin, Şeyh Akil, Hırderkal, Acemi, Ürumsuğra, Üveycil kəndlərini və digər əraziləri tutublar.

Hücumlar nəticəsində 132 silahlı şəxsin öldürüldüyü bildirilib. Bölgədən qaçan 10 minə yaxın dinc sakin isə İdlibə sığınıb.

Bundan əlavə, onlarla hərbçinin əsir götürüldüyü vurğulanıb. Xarici medianın yaydığı məlumata görə, əsir götürülən şəxslər arasında azı 3 rusiyalı döyüşçü də olub.

Qeyd edək ki, sözügedən qruplaşmanın üzvləri Hələb şəhərinin mərkəzinin 8 kilometr yaxınlığına qədər gəliblər. Hazırda bölgədə toqquşmaların hələ də davam etdiyi bildirilir. Son məlumata görə, “Heyət Təhrir əş-Şam” 245 kvadratkilometrdən çox əraziyə nəzarət edir. Baş verənlərdən sonra Suriya Prezidentinin rusiyalı həmkarı ilə danışıqlar aparmaq üçün Moskvaya yollandığı iddia olunsa da, bu xəbər təsdiqini tapmayıb.