Tailand və Kamboca sərhədində qarşıdurma | Ölən və yaralananlar var

Tailandla sərhəddə yeni döyüş əməliyyatları nəticəsində Kambocada 7 mülki şəxs həlak olub, 20 nəfər yaralanıb.

"Kamboca sülh istəyir, lakin öz ərazisini müdafiə etməyə məcburdur", – deyə senatın sədri Hun Sen deyib.

Tailand Silahlı Qüvvələrinin nümayəndəsi münaqişənin gərginləşməsi nəticəsində bir hərbçinin həlak olduğunu, 29-nun isə yaralandığını təsdiqləyib.

Tailand tərəfinin məlumatına görə, Kamboca qüvvələri döyüş zamanı yaylım atəşi sistemləri, bombardmançı pilotsuz uçuş aparatları və kamikadze dronları tətbiq ediblər. Raketlərdən bir neçəsinin mülki yaşayış məntəqələrinə düşdüyü qeyd olunur.

Tailand Ordusu sərhəd boyunca təxminən 500 müvəqqəti yerləşdirmə məntəqəsinin təşkil olunduğunu bildirib. Bu məntəqələrdə riskli zonalardan təxliyə edilmiş 125 800-dən çox insan yerləşdirilib.

Regionda vəziyyət qeyri-sabit olaraq qalır. Hər iki tərəf vətəndaşları qorumaq və davam edən toqquşmaların nəticələrini minimuma endirmək üçün tədbirlər görür.

Qeyd edək ki, Tailand və Kamboca ABŞ Prezidenti Donald Trampın rəhbərliyi altında bu ilin oktyabr ayında sülh müqaviləsi imzalamışdılar.