Tapıntının yenidən araşdırılması istənildi | Hansı problemlər aşkarlandı?

2021-ci ildə ilk dəfə təsvir edilən və "Xenodens calminechari" adlanan qeyri-adi növ yeni araşdırmalara görə, saxtalaşdırılmış fosillər əsasında təsvir edilmiş ola bilər.

Alimlər qədim dəniz canlısının çənə sümüklərinin və dişlərinin həqiqiliyini müəyyən etmək üçün yeni tədqiqatların aparılmasını tövsiyə edirlər.

Məsələ ondadır ki, fosildəki iki diş eyni çənə boşluğunda yerləşir. Bu vəziyyət məlum olan bütün digər mozazavr növləri üçün qeyri-adidir, çünki hər bir dişin öz çənə boşluğu olmalıdır.

Bundan başqa, dişlərin üzərindəki "mərkəzi örtük" adlı çıxıntı normal mozazavr dişlərinin inkişafında mövcud olmamalıdır. Bu cür çıxıntının mövcudluğu saxtakarlığın göstəricisi kimi dəyərləndirilir.

Tapıntının problemli olmasının başqa bir səbəbi də onun aşkarlandığı fosfat mədənidir. Mərakeşin Xuribqa bölgəsi saxta xüsusiyyətlərə malik fosillərlə tanınır. Fosillərin həqiqiliyini yoxlamaq üçün kompüter tomoqrafiyasının aparması istənilsə də, araşdırmanın ilk müəllifləri buna şərait yaratmayıblar.

Qeyd edək ki, "Xenodens calminechari" növü çənə sümüyünün hissəsi və dörd iti diş əsasında təsvir edilmişdi. Bu fosillər 2021-ci ildə Mərakeşin Xuribqa bölgəsindəki fosfat mədənindən tapılmışdı. Həmin dövrün araşdırma qrupu bu dişlərin unikal olduğunu iddia etmiş və dəniz sürünənləri olan mozazavrların müxtəlifliyini əks etdirdiyini vurğulamışdı.

Mozazavrlar Təbaşir dövründə okeanlarda hökmranlıq edən yırtıcı dəniz sürünənləri olub. Onların uzunluğu 3-15 metr arasında dəyişib və müxtəlif qidalanma vərdişlərinə uyğunlaşan fərqli diş strukturlarına malik olublar.