Təbii fəlakət ölkəni alt-üst etdi | Nepaldan dəhşətli görüntülər - Baku TV

Nepalın şimalında baş verən daşqın səbəbindən ölənlərin sayı 469 nəfərə çatıb.

Bu barədə ölkə polisi məlumat verib.

“469 nəfərin meyiti tapılıb. Ümumilikdə 1545 nəfər yaralanıb və xilas edilib”, – deyə son hesabatda bildirilir.

1000-ə yaxın insan itkin düşmüş hesab olunur.

Qeyd olunub ki, 30-dan çox ölkədən – ABŞ, Böyük Britaniya, Avstraliya, Kanada, İtaliya, Qazaxıstan, Rusiya, Belarus, Ukrayna və başqa ölkələrdən olan turistlər itkin düşüb. İtkin düşən 100-ə yaxın Hindistan vətəndaşı isə artıq tapılıb. Xilasetmə komandaları əlaqənin kəsildiyi bölgələrə daxil olmağa çalışırlar.

Yollar və körpülər yuyulub, kəndləri su basıb, bir sıra su elektrik stansiyaları zədələnib. Fəlakət zonasından 116 nəfər helikopterlərlə təxliyə edilib.

Nepal hakimiyyəti ölkənin şimalında zərər dəyən rayonlarda axtarış-xilasetmə işlərinin intensivliyini artırıb. Fəlakət zonasına ordunun və özəl şirkətlərin helikopterləri, eləcə də yerüstü axtarış qrupları cəlb edilib.