Tədqiqatçılardan maraqlı addım | Hazırlanan yelkənin özəllikləri açıqlandı

Beynəlxalq tədqiqatçılar qrupu ulduzlararası səyahətləri sürətləndirmək üçün yeni texnologiya inkişaf etdirib. Onlar ultrayüngül işıq yelkəni hazırlayıblar.

İnnovasiya Braun Universiteti və Delft Texniki Universitetinin alimləri tərəfindən yaradılıb.

Qeyd olunur ki, 60 millimetr ölçüsündə və yüksək əksetmə qabiliyyətinə malik işıq yelkəni cəmi 200 nanometr qalınlığında, yəni insan saçından 500 dəfə incədir. O, nitrid silisiumdan hazırlanıb, həm yüngüldür, həm də möhkəmdir.

Bu yelkən ənənəvi dəniz yelkənlərinə bənzəyir, lakin külək əvəzinə, güclü lazer şüalarından istifadə edir.

Alimlərin sözlərinə görə, yelkən metrlərlə genişlənə bilər, bu isə gələcəkdə mikroçip ölçüsündə kosmik zondu ulduzlara göndərməyi mümkün edir.

Həmçinin vurğulanır ki, süni intellekt vasitəsilə optimallaşdırılmış nanoquruluşlu aparat "Alfa Sentavr"a uçuş vaxtını min illərdən onilliklərə endirə bilər.