Tehrandan Netanyahunu hədəf alan sensasiyalı iddia

İranın nüvə problemi üzrə danışıqlar qrupunun keçmiş müşaviri, hazırda rəsmi Tehrana və hakimiyyət dairələrinə yaxınlığı ilə tanınan Tehran Universitetinin professoru Məhəmməd Mərəndi ABŞ və İran arasındakı pərdəarxası sazişlə bağlı beynəlxalq mətbuatda böyük əks-səda doğuran bəyanatla çıxış edib.

Yaxın Şərqdəki diplomatik kulisləri canlandıran bu bəyanatda İsrail rəhbərliyi kəskin tənqid olunub.

Professor Mərəndi bildirib ki, İsrailin Baş naziri Benyamin Netanyahunun atdığı düşünülməmiş və strateji baxımdan uğursuz addımlar faktiki olaraq uzun müddətdir dalana dirənmiş Vaşinqton-Tehran danışıqlar prosesini krizisdən çıxarıb və prosesi İranın xeyrinə sürətləndirib.

Onun sözlərinə görə, İsrail Ordusunun Livanın paytaxtı Beyruta etdiyi son qəfil hərbi hücum Ağ Evi və şəxsən ABŞ Prezidenti Donald Trampı beynəlxalq arenada olduqca çıxılmaz vəziyyətdə qoyub.

Mərəndi xüsusi olaraq vurğulayıb ki, məhz bu regional gərginlik Trampı geri addım atmağa və İranın irəli sürdüyü sərt şərtləri, xüsusilə də Livanın təhlükəsizliyi ilə bağlı tələbləri tamamilə qəbul etməyə məcbur edib.

Tehrandan səslənən bu genişmiqyaslı iddia, ABŞ-İran sazişinin arxasında dayanan hərbi-diplomatik gedişləri və İsrail rəhbərliyinin fəaliyyətinin Vaşinqton tərəfindən necə qarşılandığını tam çılpaqlığı ilə ortaya qoyur.