Tehranın cavab zərbəsi elə oldu ki... | ABŞ və İran arasında gərginlik yenidən artdı - Baku TV

ABŞ qüvvələri İranda bir neçə hədəfə qarşı hərbi əməliyyat həyata keçirib.

Bu barədə Birləşmiş Ştatların Mərkəzi Komandanlığı məlumat yayıb.

Qurumun açıqlamasına görə, zərbələr İranın əsassız və davamlı təcavüzkar hərəkətlərinə cavab olub.

“Mərkəzi Komandanlıq qüvvələri Ali Baş Komandanın əmrlərinə əsasən, iyunun 10-da İrandakı bir neçə hədəfə əlavə zərbələr endirib”, – deyə bəyanatda bildirilir.

Hücumlar İranın rabitə, hava hücumundan müdafiə və kəşfiyyat sistemlərini hədəf alıb.

Pentaqondan da bildirilib ki, bu hücumlar İranı danışıqlar masasında güzəştə getməyə məcbur etmək məqsədi daşıyan məcburi diplomatiya aktıdır.

İran isə ABŞ-nin hava hücumuna cavab olaraq Yaxın Şərqdəki Amerika hədəflərinə zərbələr endirib.

Qeyd olunub ki, İraqın şimalındakı Əl-Hərir aviabazasına hücum edilib və nəticədə ABŞ hərbi radarı məhv edilib. Həmçinin İranın Hörmüz boğazında ABŞ gəmilərinə və Fars körfəzində bir qayığa atəş açdığı bildirilib.

İran dövlət televiziyasının məlumatına görə, ölkənin Silahlı Qüvvələri Bəhreyndə ABŞ Hərbi Dəniz Qüvvələrinin Beşinci Donanma qüvvələrinə hücum etmək üçün dronlardan istifadə edib. Nəticədə “Patriot” hava hücumundan müdafiə sistemlərinin rabitə antenaları və radarları zədələnib.