Terror planı ifşa olundu? - ABŞ-dən təcili xəbərdarlıq

“ABŞ “Krokus Siti Holl”da baş verən terror hücumuna bənzər təhlükə ilə üzləşə bilər”.

Bunu ölkənin Federal Təhqiqat Bürosunun direktoru Kristofer Rey deyib.

Onun sözlərinə görə, ABŞ-də İsrail-HƏMAS müharibəsindən əvvəl də təxribatların baş vermə ehtimalı yüksək olub.

“Mən fəaliyyətdə olduğum müddət ərzində biz ölkənin müxtəlif şəhərlərində və bölgələrində çoxsaylı terror hücumlarının qarşısını almışıq. ABŞ-ni terrordan qorumağa davam etmək üçün isə bizə maliyyə lazımdır.

Qeyd etmək istəyirəm ki, oktyabrın 7-dən əvvəl də ölkədə zorakılıq riski artmışdı. O vaxtdan bəri biz bir çox xarici terror təşkilatlarının Amerikaya və onun müttəfiqlərinə qarşı hücumlara çağırış etdiyini görmüşük.

Bu çağırışları nəzərə alsaq, bizim ən ciddi narahatlığımız ondan ibarətdir ki, şəxslər və ya kiçik qruplaşmalar Yaxın Şərqdəki hadisələrdən ilham alacaqlar ki, burada, vətənlərində hücumlar həyata keçirsinlər. Lakin digər hücumlardan fərqli olaraq, burada koordinasiyalı təxribatın baş verməsi ehtimalı daha çox narahatlıq doğurur”, – K.Rey bildirib.

Xatırladaq ki, Rusiyanın Krasnoqorsk şəhərində yerləşən “Crocus City Hall” konsert zalında martın 22-də terror hadisəsi baş verib. Nəticədə 144 nəfər həlak olub, yüzlərlə insan yaralanıb.