Terrorçular məhv edildi, amma... | Pakistanda girov götürülən yüzlərlə şəxslə bağlı əməliyyat

Pakistan Təhlükəsizlik Qüvvələri ekstremist “Bəlucistan Azadlıq Ordusu”nun yaraqlıları tərəfindən ələ keçirilən qatarın girov saxlanılan 450 sərnişinindən 155-ni azad edib.

Bu barədə xarici mətbuatda məlumat verilib.

Bildirilib ki, azad edilənlər arasında 15 uşaq və 31 qadın var. Xəsarət alan 17 şəxs xəstəxanaya yerləşdirilib.

Ölkənin Daxili İşlər Nazirliyindən bildirilib ki, əməliyyat zamanı 27 terrorçu öldürülüb. Girovların xilas olunması əməliyyatı davam etdirilir.

Təhlükəsizlik Qüvvələri ekstremistlərin əlində olan vətəndaşlara zərər verməmək üçün son dərəcə ehtiyatlı hərəkət edir. Əməliyyat tədbirləri zamanı hücumda iştirak edən 16 yaraqlı zərərsizləşdirilib.

Bildirilib ki, yaraqlılar Bəluc siyasi məhbuslarını 48 saat ərzində azad etməsələr, girovları öldürməklə hədələyiblər.

Qeyd edək ki, martın 11-i Pakistanda yaraqlılar Kvettadan Pişəvərə gedən qatarda 450 sərnişini girov götürüblər. Ekstremistlər dəmiryol relslərini partladıb, daha sonra qatara atəş açıblar. Qatarın maşinisti yaralanıb, təhlükəsizlik işçiləri ilə silahlılar arasında atışma baş verib.