Tramp ABŞ-nin Tehrandan tələblərini açıqlayıb - Baku TV

"ABŞ sülh razılaşması halında ya Tehran hakimiyyətinin köməyi ilə, ya da hərbi yolla İrandan yüksək dərəcədə zənginləşdirilmiş uranı çıxaracaq".

Bu barədə ABŞ Prezidenti Donald Tramp bildirib.

O, münaqişənin həlli üçün İranla aparılan danışıqların gedişatı və bunun iqtisadiyyata təsiri barədə ətraflı danışıb:

"Əgər razılaşma əldə etsək, birlikdə işləyəcəyik. Bu işi onlarla birlikdə və ya onsuz edəcəyik. Amma bizə atəş açmalarına icazə verməyəcəyik. Əgər razılaşma əldə etməsək, onları hərbi yolla, çox sərt şəkildə məhv edəcəyik. Beləliklə, hər iki halda da təhlükəsiz olacağıq".

O həmçinin qeyd edib ki, danışıqlar başa çatana qədər Amerika qoşunlarını bölgədə saxlamaq niyyətindədir.

Tramp tərəflərin memorandum imzalamağa çox yaxın olduğunu, lakin İranın nüvə ambisiyalarından imtina etməsində israrlı olduğunu bildirib. Amerika lideri razılaşmanın İranın nüvə silahı əldə etmək şərtlərini pozması ehtimalını aradan qaldıracağını vurğulayıb.

"Bizim onların nüvə silahı hazırlamaması ilə bağlı bir bəndimiz var idi və mən bundan məmnun deyildim. Bəs əgər onlar uranı hazırlamasalar, əvəzinə gedib alıb, əldə etsələr necə olar? Görürsünüz, bunu da nəzərə almaq lazımdır. Deməli, onların nüvə silahı hazırlamaq, almaq, əldə etmək və ya sahib olmaq hüququ yoxdur", – deyə Tramp bildirib.

O, İranın yeni rəhbərliyinin daha rasional və çox ağıllı olduğunu sübut etdiyini bəyan edib. Onun sözlərinə görə, İranın Ali Rəhbəri Müctəba Xamenei müqavilənin təsdiq prosesində iştirak edir: "İstəsəydi, onunla danışardım, amma birbaşa onunla danışmamışam. O, daha gənc və daha rasionaldır".

Tramp həmçinin İranla müharibənin ABŞ-də və regionda enerji qiymətlərinin, eləcə də gübrə və digər məhsulların qiymətlərinin artmasına səbəb olduğunu etiraf edib. Bununla belə, o, Vaşinqton və Tehran arasında razılaşmadan sonra vəziyyətin normallaşacağını bildirib.