Tramp açıqlama verdi, Tehran dərhal yalanladı | Pərdəarxasında nələr baş verir? - Baku TV

ABŞ Prezidenti Donald Tramp İranla yeni təmasların baş tuta biləcəyi ilə bağlı açıqlama verib.

Ağ Ev lideri "Truth Social" sosial şəbəkəsində paylaşdığı mesajda İran tərəfinin görüş keçirilməsi təklifi ilə çıxış etdiyini bildirib.

"İran görüş keçirilməsini istəyib. Bu görüş iyunun 30-da Dohada baş tutacaq", – deyə Donald Tramp paylaşımında qeyd edib.

Görüşün gündəliyi və hansı səviyyədə keçiriləcəyi barədə əlavə məlumat açıqlanmayıb.

İran Xarici İşlər Nazirliyinin sözçüsü İsmayıl Bəqai isə bildirib ki, yaxın günlərdə Vaşinqtonla Tehran arasında heç bir səviyyədə danışıqlar aparılmayacaq.

"İranın ekspert nümayəndə heyəti razılaşmaların icrasına nəzarət etmək üçün Dohaya gedəcək", – deyə diplomat bildirib və əlavə edib ki, ABŞ-nin neft satışı ilə əlaqəli 10-cu bənd üzrə öhdəlikləri ilə bağlı Vaşinqtondan lazımi icazələr verilib və icranın gedişatı izlənilir. Onun sözlərinə görə, 11-ci bəndin – İran aktivlərinin blokdan çıxarılmasının icrası da nəzarət mərhələsindədir.