Tramp İranın bütün mina yerləşdirən gəmilərinin məhv edilməsi əmrini verdi - Baku TV

İran Hörmüz boğazında ələ keçirilən gəmiləri Bəndər-Abbas limanına aparıb.

Bu barədə mənbələrə istinadən "Reuters" agentliyi məlumat yayıb.

Bildirilib ki, konteynerlərdən biri Panama, digəri isə Liberiya bayrağı altında hərəkət edirdi. Yunanıstanın "Tekmar" şirkəti tərəfindən idarə edilən ikinci gəminin heyəti Ukrayna ilə Filippindən olan 21 nəfərdən ibarət olub. Vurğulanıb ki, bu gəmi Omanın şimal-qərbində İslam İnqilabı Keşikçiləri Korpusunun patrul qayığı tərəfindən ələ keçirilib.

ABŞ Prezidenti Donald Tramp Hörmüz boğazında minalar yerləşdirən bütün İran gəmilərinin məhv edilməsi barədə əmr verib. O bu barədə "Truth Social"da yazıb.

"Mən Birləşmiş Ştatların Hərbi-Dəniz Qüvvələrinə Hörmüz boğazının sularında mina yerləşdirən istənilən gəmini məhv etməyi əmr etdim. Heç bir tərəddüd olmamalıdır", – deyə Tramp əlavə edib.

Ağ Ev rəhbəri həmçinin bildirib ki, ABŞ qüvvələri artıq boğazda minatəmizləmə işləri aparır.

Bu arada, İtaliya Hörmüz boğazının minalardan təmizlənməsi üzrə beynəlxalq missiya çərçivəsində dörd gəmi göndərməyə hazırdır.

İtaliya Hərbi Dəniz Qüvvələrinin qərargah rəisi Cuzeppe Berutti Berqotto qeyd edib ki, gəmilər şimal-qərbdəki La-Spesiya limanından yola düşəcək və əməliyyat bölgəsinə qədər təxminən dörd həftə yol qət edəcəklər.