Tramp İranın razılaşmaq istədiyini bildirib | "Daha sərt tədbirlərlə üzləşə bilər" - Baku TV

ABŞ Prezidenti Donald Tramp İranın razılaşma əldə etmək istədiyini bildirib, lakin bu barədə əlavə detalları açıqlamayıb.

O, Ağ Evdə jurnalistlərə açıqlamasında prosesin necə inkişaf edəcəyinin zamanla bəlli olacağını deyib.

Prezident qeyd edib ki, İranla bağlı vəziyyət mürəkkəbdir və ABŞ bölgədə hərbi mövcudluğunu davam etdirir. Onun sözlərinə görə, ABŞ-nin İrana doğru Venesuelaya göndəriləndən daha böyük bir qoşunu mövcuddur.

Tramp çıxışı zamanı bildirib ki, İran əvvəllər yüzlərlə insanın edamını planlaşdırıb, lakin ABŞ-nin sərt mövqeyindən sonra bu fikrindən dönüb. O, bu məsələdə təzyiq siyasətinin rol oynadığını vurğulayıb və “çoxlu insanın hələ də öldürüldüyünü” deyərək vəziyyətin ciddi olaraq qaldığını qeyd edib.

Jurnalistin İranla bağlı mümkün hərbi addımlar barədə sualına cavab verən Tramp bu mövzuda detallara girmək istəmədiyini də bildirib. Bununla belə, ABŞ-nin dünyanın ən güclü donanmasına və ordusuna sahib olduğunu vurğulayıb. O əlavə edib ki, prezidentliyi dövründə ABŞ Ordusunu yenidən qurub və bu güc dəfələrlə nümayiş etdirilib.

ABŞ Prezidenti İranı nüvə proqramı ilə bağlı danışıqlara qayıtmağa çağırıb və əks halda, daha sərt tədbirlərlə üzləşə biləcəyini bildirib. Tehran isə mümkün hücum halında ABŞ, İsrail və onların müttəfiqlərinə qarşı cavab tədbirləri görəcəyi ilə hədələyib.