Tramp Məhəmməd bin Salmana zəng etdi

İranın keçmiş xarici işlər naziri Kamal Xarazi aprelin 1-də Tehranda baş verən təyyarə hücumu zamanı ağır yaralanıb, həyat yoldaşı isə həlak olub.

Bu barədə yerli media məlumat yayıb.

Məlumata görə, İranın keçmiş xarici işlər nazirinin Tehranda yerləşən evi ABŞ və İsrail tərəfindən endirilmiş hava hücumunun hədəfi olub. Həmin vaxt Kamal Xarazi ağır yaralanaraq xəstəxanaya yerləşdirilib, həyat yoldaşı isə ölüb.

Qeyd edək ki, Kamal Xarazi Nyu-Yorkda İranın BMT-dəki səfiri vəzifəsində çalışdıqdan sonra 1997-ci ildən 2005-ci ilədək islahatçı prezident Məhəmməd Xatəminin dövründə xarici işlər naziri olub.

Bu arada, ABŞ Prezidenti Donald Tramp aprelin 1-də Səudiyyə Ərəbistanının vəliəhd şahzadəsi Məhəmməd bin Salmanla telefon danışığı aparıb və bu zaman İranda mümkün atəşkəs məsələsini qaldırıb. Bu barədə "Axios" portalı məlumat yayıb. Üç amerikalı rəsmi postala bildirib ki, Vaşinqton və Tehran İran tərəfinin Hörmüz boğazını açması müqabilində atəşkəs məsələsini müzakirə edirlər.

Mənbələr bu müzakirələrin birbaşa və ya vasitəçilərin köməyi ilə aparıldığını açıqlamayıblar. Hazırda razılığın əldə olunub-olunmadığı məlum deyil. Bununla belə, rəsmi şəxslər Donald Trampın bu imkanı həm öz nümayəndələri ilə, həm də ondan kənarda müzakirə etdiyini bildiriblər.